उत्तराखंड लोकभाषा साहित्य मंच, दिल्ली का द्वारा रविवार 9 मार्च 2025 खुणि डीपीएमआई, न्यू अशोक नगर मा गढ़वाल़ी कुमाऊंनी, जौनसारी भाषाओं की ग्रीष्मकालीन कक्षाओं मा सहयोग कर्नू वल़ा शिक्षकों एवं सामाजिक कार्यकर्ताओं का वास्ता एक कार्यक्रम को आयोजन करेगे। होली को त्योहार नजीक छ त ये कार्यक्रम तै ‘होली मिलन’ समारोह का रूप मा मनये गे।
उत्तराखंड लोकभाषा साहित्य मंच दिल्ली एनसीआर का दगड़ै-दगड़ गढ़वाल- श्रीनगर मा हर साल रूड़्यूं की छुट्यूं मा नै छिंवाल़ का नौन्याल्यूं का वास्ता गढ़वाली कुमाऊनी व जौनसारी भाषाओं की कक्षाओं को आयोजन करद। यूं कक्षाओं मा वर्ष 2024 मा जौंन बि लोगों न् शिक्षक या व्यवस्थापक का रूप मा ये कार्यक्रम का संचालन मा अपणो योगदान दे वूं सब्यूं तैं उत्तराखंड लोकभाषा साहित्य मंच की तरफ से सम्मानित करेगे।
केंद्र प्रमुखों अर सहयोगियों का ये सम्मान समारोह मा दिल्ली राज्य सरकार मा मंत्री कपिल मिश्रा मुख्य अतिथि छया। मिश्रा जीन् बोली कि दिल्ली सरकार गढ़वाली कुमाऊनी व जौनसारी अकादमी का माध्यम से उत्तराखंडै बोली-भाषाओं का संरक्षण व सम्वर्द्धन का वास्ता लगातार काम कर्नी छ। दगड़ै-दगड़ सरकार अपणि बोली भाषाओं का वास्ता काम कर्न वल़ि संस्थाओं तै बि हर संभव मदद देणी रैंद।
ये मौका पर लोकभाषा साहित्य मंच का संरक्षक व भाजपा प्रदेश मंत्री विनोद बछेतीन् बोले कि या संस्था 2013 बटि अपणि नई पीढ़ी तै अपणि जड़ों से जुड़णा खातिर ये तरह को प्रयास कर्नी छ।
मंच का संयोजक दिनेश ध्यानी जीन् बतै कि मंच द्वारा 34 केंद्रों पर कक्षाओं को आयोजन करेगे। वूंन बोले कि मंच द्वारा ऑनलाइन कक्षाओं का माध्यम से विदेश तक बि अपणि भाषाओं की खुशबु पौंछणी छ। रंगकर्मी बृजमोहन वेदवाल अर डॉ कुसुम भट्ट द्वारा यूं कक्षाओं को संचालन शनिवार व रविवार खुणि करे जांद जैमा इंग्लैंड से बच्चा अर वूं का ब्वे बाबु ऑनलाइन जुडदन।
ये कार्यक्रम मा जयपाल सिंह रावत, दयाल सिंह नेगी, रमेश घिल्डियाल, अनिल पंत, रेखा चौहान, दर्शन सिंह रावत आदि का दगड़ कई शिक्षक, साहित्यकार, समाज सेवी व केंद्र संचालक व व्यवस्थापक मौजूद छया।
-दिनेश ध्यानी
