ऋषिकेश-कर्णप्रयाग रेलवे लाइन: देशै सबसे लम्बि रेल सुरंग ह्वे आर-पार

ऋषिकेश-कर्णप्रयाग रेलवे लाइन का वास्ता बणी भारतै सबसे लंबि रेल सुरंग अब आर-पार ह्वेगे।। यीं घड़ि पर केंद्रीय रेल मंत्री अश्विनी वैष्णव अर उत्तराखंड का मुख्यमंत्री पुष्कर सिंह धामी का दगड़ै-दगड़ सांसद, गढ़वाल अर अन्य नेतागण बि मौजूद छया। रेल विकास निगम लिमिटेड (आरवीएनएल) न् एक बड़ि उपलब्धि हासिल करे जो उत्तराखंड की 125 किलोमीटर लंबी ऋषिकेश-कर्णप्रयाग ब्रॉड गेज रेल परियोजना से जुडी़ं छ। या रेल परियोजना 105 किलोमीटर सुरंग का भितर बणीं छ। येमा ऋषिकेश बटि कर्णप्रयाग तक कुल 16 सुरंग छन।

यीं ऐतिहासिक घड़ि मा केंद्रीय रेल मंत्री अश्विनी वैष्णव अर उत्तराखंड का मुख्यमंत्री पुष्कर सिंह धामी न् संयुक्त रूप से सुरंग स्थल पर पौंछिक साल-निराल करे। ये दौरान ऊन निर्माण कार्यों को जायजा ल्हे अर अधिकारियों से सुरंग की जानकारी ल्हे। केंद्रीय रेलवे मंत्री अश्विनी वैष्णव न् सुरंग का सफल ब्रेकथ्रू पर बोले कि य उत्तराखंड का विकास की दिशा मा एक खास लपाग छ। ऊन यीं उपलब्धि खुणि सब्बि रेलवे अधिकारियों, कर्मचारियों अर श्रमिकों तैं बधाई दे। रेल मंत्री न् यो बि बोले कि ऋषिकेश-कर्णप्रयाग रेल परियोजना को काम सरासर होणू छ अर जल्द हि इस रेल लाइन पर संचालन शुरू होणै उम्मीद छ। य परियोजना राज्य का पर्वतीय क्षेत्रों तैं रेल नेटवर्क से जोड़णा दिशा मा मील को पत्थर साबित होली। ऊंन बोले कि य (देवप्रयाग सौड़ से जनासु तक) 14.57 किलोमीटर लंबी रेलवे सुरंग उत्तराखंड की हि ना बल्कि  पूरा भारत मा सबसे लंबि सुरंग छ। वूंन बोले कि केंद्र सरकार की पहल पर यो पैलि बार छ जब देश का पहाड़ी इलाकों मा रेल सुरंग बणाणा खुणि टीबीएम तकनीक को इस्तेमाल करेगे। वूंन् बोले कि 9.11 मीटर व्यास वल़ि यीं सिंगल-शील्ड रॉक टीबीएम न् काम मा जो तेजी अर सटीकता दिखै, वो वैश्विक स्तर पर एक नयो मापदंड स्थापित करद। रेल मंत्री न् बोले कि  ऋषिकेश-कर्णप्रयाग परियोजना उत्तराखंड का ऋषिकेश,  देवप्रयाग, श्रीनगर, रुद्रप्रयाग, गौचर अर कर्णप्रयाग जना प्रमुख शहरों तैं जोड़लि।

मुख्यमंत्री पुष्कर सिंह धामी न् बोले कि या सुरंग उत्तराखंड का विकास की दिशा मा एक ऐतिहासिक उपलब्धि छ। ऋषिकेश-कर्णप्रयाग रेल परियोजना राज्य का दूरस्थ पर्वतीय क्षेत्रों तैं देश का बाकी हिस्सों से जोड़ण मा एक अहम भूमिका निभालि। य न केवल स्थानीय लोगों क वास्ता आवागमन तैं सरल बणाली, बल्कि क्षेत्र मा पर्यटन, व्यापार अर आर्थिक गतिविधियों तैं बि एक नई गति देलि। ऊंन् बोले कि प्रधानमंत्री नरेंद्र मोदी जी का नेतृत्व मा राज्य मा इंफ्रास्ट्रक्चर विकास तैं नई दिशा अर गति मिले। देवप्रयाग-सोड़ से श्रीनगर जनासु तक की य सुरंग तकनीकी दृष्टि से बि एक बड़ि उपलब्धि छ अर यांसे पता चलद कि कठिन भौगोलिक परिस्थितियों का बावजूद हम विकास का कार्यों तैं भल्लो तैं करि सकदां। ऊंन् यो बि बोले कि टनकपुर बागेश्वर रेल परियोजना को सर्वे बि ह्वेगे अर जल्द हि अगनै की कार्यवाही करे जाली।

ये मौका पर केबिनेट मंत्री डॉ धन सिंह रावत, गढ़वाल सांसद अनिल बलूनी, जिलाधिकारी डॉ. आशीष चौहान, जिलाधिकारी टिहरी मयूर दीक्षित, आरवीएनएल के चेयरमैन व मैनेजिंग डायरेक्‍टर प्रदीप गौर, अपर जिलाधिकारी अनिल सिंह गर्ब्याल, संयुक्त मजिस्ट्रेट दीपक राम चंद्र शेट, जीएम उत्तर रेलवे  अशोक कुमार वर्मा, प्रबंधक निदेशक  भानु प्रकाश, मुख्य परियोजना प्रबंधक आरवीएनएल अजित यादव, जीएम आरवीएनएल सुमित जैन दगड़ अन्य लोग उपस्थित छया।