उत्तराखंड: 30 अप्रैल, 2025 बटि चारधाम यात्रा शुरु

चार धाम यात्रा 30 अप्रैल, 2025 खुणि गंगोत्री अर यमुनोत्री धाम का कपाट खुलण का दगड़ शुरू होलि। हर साल, लाखों श्रद्धालु यीं पवित्र यात्रा तैं करदन, जैमा चार तीर्थ स्थल शामिल छन- गंगोत्री, यमुनोत्री, केदारनाथ अर बद्रीनाथ। ​चार धाम यात्रा हमेशा यमुनोत्री से शुरू होंद। जैका बाद दुसरो पड़ाव गंगोत्री धाम छ। हिंदू धर्म का प्रमुख तीर्थ स्थलों में से एक केदारनाथ धाम तीसरा पड़ाव छ, जख भगवान शिव की पूजा करे जांद। फिर चौथो अर आखिरी पड़ाव बद्रीनाथ धाम छ, जख बद्रीनाथ धाम मा जगत पालनहार विष्णु भगवान की पूजा करे जांद।

ये साल चारधाम यात्रा 30 अप्रैल खुणि अक्षय तृतीया का पावन अवसर पर गंगोत्री धाम का कपाट सुबेर 10.30 बजि अर यमुनोत्री धाम का कपाट सुबेर 11.50 बजि खुलण का दगड़ शुरू होणवल़ि छ। वखी, केदारनाथ धाम का कपाट भक्तों का वास्ता 2 मई 2025, शुक्रवार खुणि सुबेर 7 बजि खुलला। येका अलावा, बद्रीनाथ धाम का कपाट 4 मई 2025, रविवार का दिन खुलणी।

यीं पवित्र यात्रा का वास्ता राज्य का सात जिलों मा मॉकड्रिल आयोजित करे जाणी छन। उत्तरकाशी, चमोली, रुद्रप्रयाग, देहरादून, पौड़ी, टिहरी अर हरिद्वार मा राष्ट्रीय आपदा प्रबंधनै तरफ बटि सरकार की तैयारियों तैं परखै जाणू छ। 30 अप्रैल सबटि शुरू होण वळि चारधाम यात्रा की तैयारि लगभग पूरि ह्वे गिन्।  केदारनाथ, बद्रीनाथ, गंगोत्री, यमुनोत्री का अलावा पौड़ी गढ़वाल रेंज मा श्रद्धालुओं की सुविधाओं का वास्ता व्यापक इंतजाम करे जाणा छन।

यात्रियों की सुविधा का वास्ता पौड़ी गढ़वाल तैं तीन ज़ोन मा बंटेगे अर पूरा इलाका मा 11 सेक्टर बणयां छन। यात्रियों की सुविधा को विशेष ध्यान मुख्यमंत्री जी का तरफ से दियां निर्देशों का पालन करे जाणो छ।

ट्रैफिक जाम की समस्या से निपटण का वास्ता 2000 गाड़ियों की क्षमता वल़ा पार्किंग स्थल बि बणये जाणा छन। चार धाम यात्रा मार्ग पर साफ-सफाई अर स्वास्थ्य सुविधाओं पर खास ध्यान दियेणू छ। स्वास्थ्य सेवा अर सुरक्षा तैं ल्हेकी स्वास्थ्य विभाग न् एडवाइजरी जारी करि जैमा यात्रियों तै अपणि यात्रा की योजना कम से कम सात दिनों खुऩि बणाणै की सलाह दियीं छ। यीं बार भी 11 भाषाओं मा दिशा-निर्देश जारी करे गैनि ताकि ज्यादा से ज्यादा श्रद्धालुओं तैं स्वास्थ्य विभागै एसओपी तैं समझण मा क्वी दिक्कत ना हो। पूरे यात्रा रूट पर यीं बार 50 स्क्रीनिंग पॉइंट बणयां छन।