सरकार जन बोलदि छ तनि काम बि ह्वे जाउन त ये देश कि तस्वीर बदल जौ। यो बि सच छ कि य तस्वीर सरकार कै भरोसा नि बदले सकेंदि। यीं तस्वीर बदलणों आम आदमि तैं बि हाथ खुटा हलौंण पड़ला, ईमानदारी से सरकारै योजनों पर काम करण पड़लो। देखे जौ त इन होंदु कख छ? लोग छुयूं ही छुयूं मा कखा कख पौंछै देंदन योजनौं तैं।
ऐंस्वा बजट मा सरकार बोलणी छ कि हम गौं बिटि लोगू पलायन रोकणो गौं तैं गोद ल्हेकि विकास करला।गौं बिटि जयां लोग यीं धरति से जोड़े जाला। ठण्ड्यूं मा बि जात्रा होलि।शिक्षण संस्थानु तैं नवाचार अर उद्यमशीलता को केन्द्र बणाये जालो।घुमण घमणै नै नै जगा खोजे जैलि ,सबि जिला हवाई सम्पर्क से जोड़े जाला अर उद्योग धंधों का वास्ता वातावरण बणाये जालो।सरकारै आईटी अर कृत्रिम मेधा तैं उच्च शिक्षा का पाठ्यक्रम मा जोड़णै मंशा छ। ऋषिकेश मा हिमालयन संग्रहालय बणाये जालो। सरकार उत्तराखंड तैं वैश्विक योग केन्द्र बणौणो काम करलि।
सरकारन ये बजट मा अपणि मंशा त बतै यलि जनता यूं कामु तैं करणो अफु बि हाथ बढ़ौ त यि काम ह्वे सकदन अर यि काम ह्वे जाला त जै विकसित उत्तराखण्डै बात सरकार करणी छ वांमा एक लपाग त अगनै बढ़ि जालि।
