फिल्म निर्माण का वास्ता पैलि पंसद हूंदा जाणू छ उत्तराखंड

उत्तराखंड अपणि उच्चि-निसि डांडि-कांठ्यूं अर बिगरैलि घाट्यूं का कारण फिल्म निर्माण का वास्ता निर्माता-निर्देशकों की पैलि पसंद बणदा जाणू छ। सरकार की सौंगी अर सरल फिल्म नीति बि यांमा काफी कारगर साबित होणि छ। आजकल उत्तराखंड मा अलग-अलग जगों पर अलग-अलग फिल्मों की शूंटिग होणी छ। अर खुशि की बात छ कि यूं फिल्मों मदे द्वी-तीन गढ़वाल़ी फिल्म बि छन।

अबि हाल हि मा उत्तराखंड फिल्म विकास परिषद का मुख्य कार्यकारी अधिकारी बंशीधर तिवारी न् देहरादून का हल्दूवाला स्थित बॉर्डर 2  का सेट पर फिल्म अभिनेता सनी देओल अर निर्देशक अनुराग सिंह दगड़ि भेंट करे। बंशीधर तिवारी न् बतै कि राज्य सरकार द्वारा मिला वल़ि सुविधा उत्तराखंड तैं एक मजबूत फिल्म डेस्टिनेशन बणौणी छ।

इन्नि अजगाल देहरादून अर ऋषिकेश मा कतनै हिंदी फिल्मों की शूंटिग चलणी छ। फिल्म गिन्नी वेड्स सनी की शूटिंग देहरादून मा होणी छ।वखि, अन्नू कपूर, पवन मल्होत्रा अर बिजेंद्र काला अभिनीत कॉमेडी सटायर  ‘उत्तर दा पुत्तर’ की शूटिंग देहरादून अर ऋषिकेश मा होणी छ।

हिंदी फिल्मों का दगड़ै-दगड़ गढ़वाली फिल्म बि अब काफी बणणी छन। अजगाल गढ़वाली भाषै तीन फिल्म—मारचा, तेरी माया अर नमक—की शूटिंग  देहरादून, टिहरी अर उत्तरकाशी मा होणी छ। यूं फिल्मों मा स्थानीय संस्कृति, परंपरा और बोली तैं बढ़ावा त मिलणू हि छ दगड़ मा यूं फिल्मों मा आधुनिक तकनीक को प्रयोग बि होणू छ। यां सब से थोड़ा भौत स्थानीय लोगों तैं रोजगार बि मिलणू छ। ये साल माने 2024-25 मा बल  रिकॉर्ड 225 फिल्मों की शूटिंग अनुमति सरकार द्वारा दियेगे जैतैं एक अच्छी पहल माण्ये जांद।