कोटद्वार: लोक कलाकार स्व. रामरतन काला जी की याद मा आयोजन

निवेदन: ‘सूण ल्यो’ बटन पर क्लिक करिक आप खबर पढ़णै जगा सूण बि सकदन

दिनांक २१ फरवरी २०२५,*अंतर्राष्ट्रीय मातृभाषा दिवस* का उपलक्ष म उत्तराखण्ड का लोक कलाकार स्व. रामरतन काला जी की याद मा धाद लोकभाषा एकांश की तरफ बटि भव्य कार्यक्रम कु सफल आयोजन करे ग्ये ।

कार्यक्रम मा स्व.काला जी का व्यक्तित्व अर ऊंका संस्कृति संरक्षण का प्रयासों पर भी चर्चा करि ग्ये , दुसरि तरफ ऊंका द्वारा जौ गीतों, नाटको, व फिल्मो मा अभिनय कर्यू छो ऊमा से कुछ कू मंचन करी अर ऊंथे भावभीनी श्रद्धांजलि अर्पित करे ग्ये ।
कण्वनगरी कोटद्वार का नगर निगम प्रेक्षागृह मा आयोजित समारोह का शुभारंभ मा मेयर शैलेंद्र सिंह रावत जी द्वारा धाद लोकभाषा एकांश का तरफ बटि लोकभाषा संरक्षण का खातिर जो प्रयास लगातार हुणू च वेकी सराहना करी ग्याइ। ऊन बोली कि संस्था द्वारा संस्कृति थे बचाणो कू अभियान जो शुरू हुयूं च, येमा प्रत्येक व्यक्ति थे जरूर सम्मिलित हूण चहेणू। येका अलावा ऊन बोली कि पूर्व मा समाज, संस्कृति अर संस्कारों से जुड्यूं छो, जैकि झलक पूरा सामाजिक परिवेश मा दिखेंदी छै। पर आजै पीढ़ी थे अपडा अधिकार त पता छन। मगर, कर्तव्यों कु बोध नि च। येकु एकमात्र कारण युवा पीढ़ी कु अपडी संस्कृति बटि दूर हूण च।

कार्यक्रम मा बतौर विशिष्ट अतिथि रंगकर्मी व NSD का चर्चित श्री श्रीश डोभाल जी, वरिष्ठ संस्कृतिकर्मी यशोधर डबराल जी, आकाशवाणी मा पूर्व निदेशक चक्रधर कंडवाल जी छा जौंन अपडा उदबोधन मा स्व. काला जी का दगडा बितयां क्षणों थे याद करदा ऊथैं लोक से जुडयूं सच्चु कलाकार बथें। श्री अनुसूया प्रसाद डंगवाल जी की अध्यक्षता मा आयोजित ये कार्यक्रम मा धाद संस्था का संरक्षक श्री जगमोहन सिंह बिष्ट जी, अध्यक्ष श्रीमती रिद्धि भट्ट जी, सचिव श्री राजेश खत्री जी, श्री त्रिभुवन उनियाल जी, श्री सोहन मैंदोला जी, श्रीमती सरिता मैंदोला जी, श्री पंकज ध्यानी जी, रश्मि बहुखंडी जी, स्व. श्री रामरतन काला जी की पत्नी कमला देवी जी, पुत्र श्री गौरव काला जी सहित कई अन्य व्यक्ति मौजूद छा। गढ़ कला सांस्कृतिक संस्था मंच पौड़ी बटि लोकगायक अनिल बिष्ट जी एवं पूरी टीम द्वारा रंगारंग गढ़वाली कार्यक्रम प्रस्तुत किए ग्याइ। प्रस्तुति का दौरान दर्शक गण नचण फर मजबूर व्हे गेनि।
स्व. श्री राम रत्न काला जी की कालजेय रचना “हिमालय का बेटा हम वीर पहाड़ी देश की सेवा मा हम रैंदा अगाडी” थे जितेंद्र काला जी द्वारा सब्यूं का समणि प्रस्तुत किये ग्याइ।

स्व. काला जी द्वारा जीवन मा अनेक नाटको मा अभिनय करी, ऊमा से एक सुप्रसिद्ध नाटक *खाडू लापता* भी छो, जैकु मंचन डिग्री कॉलेज का विद्यार्थियों कैरि, प्रसिद्ध गढ़वाली हास्य नाटक खाडू लापता की प्रस्तुतिन खूब वाह-वाहि बटोरी। लोक कलाकार जीतेंद्र काला जी का दिशा-निर्देशन मा संपन्न व्हे, ये नाटक मा आकाश, आकाश सिंह रावत, हिमांशु रावत, अंजलि नेगी, उत्कर्ष नेगी द्वारा मंचन कैरि ग्याई।
कार्यक्रम मा एक और आकर्षण रैं जैमा श्रीमती सरिता मैंदोला जी का दल की ओर बटि “सैंणी को मरयूं छौं…” गीत पर आकर्षक नृत्य प्रस्तुति करे ग्याइ, लुखुन जै थे बहुत पसन्द कैरि।
सभी कलाकारों अर अतिथियों थे स्मृति स्वरुप पौधा भेट करिके सम्मानित करि, अर सभ्यूं कू धन्यवाद ज्ञापित भी करे ग्याइ।
कार्यक्रम क अंत म द्वी मिनट कु मौन रखी कन स्व. घनानंद जी उर्फ घन्ना भाई थे श्रद्धांजलि अर्पित करै ग्याइ।