देहरादून। राष्ट्रीय रोपवे विकास कार्यक्रम कि पर्वतमाला परियोजना का अन्तर्गत उत्तराखण्ड मा सोनप्रयाग बिटि केदारनाथ तलक बणण वाल़ा रोपवे तैं केन्द्रीय मंत्रिमंडल बिटि मंजूरी मिलिगे। यीं परियोजना पर चार हजार इक्यासी करोड़ रुप्या खर्च होला।
भारत सरकारा केन्द्रीय मंत्री अश्वनी वैष्णव जिन बतै कि तीर्थ जात्र्यूं का वास्ता य परियोजना वरदान साबित होलि। अबि लोगु तैं सोनप्रयाग बिटि केदारनाथ पौंछण मा आठ,नौ घण्टा लगदन तब रोपवे से लोग छत्तीस मिनट मा केदारनाथ पौंछि जला।
सोनप्रयाग बिटि केदारनाथ तलक बारा किलोमीटर लम्बु रोपवे होलु। रोपवे कि एक ट्राली मा छत्तीस लोग बैठ सकला। एक दौं मा दस से बारा ट्रालि चललि। यांसे एक घण्टा मा पांच सौ से एक हजार जात्री केदार बाबा दर्शन करि सकला। ये रोपवे मा बीस टावर लगला अर बीच मा तीन स्टेशन होला।
