ग्राम सिरोली-पौड़ी गढ़वाल मा बत्तीसवों उमेश डोभाल स्मृति सम्मान समारोह आयोजित
। पत्रकार उमेश डोभाल का पैतृक गांव मा ह्वे कार्यक्रम

ग्राम सिरोली-पौड़ी गढ़वाल मा बत्तीसवों उमेश डोभाल स्मृति सम्मान समारोह आयोजित करेगे। सिरोली का राजकीय इण्टर कालेज क्यार्क मा आयोजित समारोह मा वरिष्ठ साहित्यकार महावीर रंवाल्टा तैं उमेश डोभाल स्मृति सम्मान, कवि हर्ष काफर तैं गिरीश तिवारी गिर्दा जन कवि सम्मान, राजेन्द्र रावत राजू जन सरोकार सम्मान समीर शुक्ल तैं प्रदान करेगे। वर्ष 2024 को इलेक्ट्रानिक मीडिया पुरस्कार अल्मोड़ा का किशनचंद्र जोशी अर सोशल मीडिया पुरस्कार उत्तरकाशी का पत्रकार प्रेम पंचोली तैं प्रदान करेगे।
पुरस्कृत अर सम्मानित होण वल़ा साहित्यकार, पत्रकारों तैं प्रशस्ति,अंगवस्त्र, प्रतीक चिन्ह अर ग्यारह हजार रुपये की धनराशि दियेगे। पत्रकार उमेश डोभाल का पैतृक गांव मा आयोजित सम्मान समारोह मा चामी टीन एजर क्लब अर दगड़्या क्लब तैं अनिरुद्ध जोशी व भुवनेश्वरी जोशी पुरस्कार से पुरस्कृत करेगे। ये बाल क्लब जनपद मा बेहतरीन गतिविधि संचालित करदन। पुरस्कार स्वरूप द्विया क्लबों तैं प्रशस्ति पत्र, प्रतीक चिन्ह अर 25 हजार रुपए की धनराशि दियेगे। समारोह मा उत्तराखण्ड की पत्रकारिता का वर्तमान परिदृश्य पर विचार-गोष्ठी बि आयोजित करेगे।
ये आयोजन का बारा मा उमेश डोभाल स्मृति ट्रस्ट का अध्यक्ष गोविन्द पंत राजू न् बोले कि ट्रस्ट द्वारा पत्रकारिता का साथ- साथ अलग-अलग क्षेत्रों मा खास काम कर्न वल़ा व्यक्तित्व सम्मानित करे जांदन।
सम्मान समारोह का मुख्य अतिथि लोकगायक नरेन्द्र सिंह नेगी न् बोले कि यो पैलो अवसर छ जब उमेश डोभाल का गांव मा यो आयोजन होणू छ। यो एक सम्मानजनक आयोजन छ जैमा समाज मा विभिन्न क्षेत्रों मा काम कर्न वल़ा लोगों तैं सम्मान होंद।
उमेश डोभाल स्मृति सम्मान से सम्मानित होण वल़ा साहित्यकार महावीर रंवाल्टा न् बोले कि मी तैं यो सम्मान साहित्य का क्षेत्र मा मिले अर ये सम्मान का बाद मेरि जबाबदेही हौरि बढ़गे।