द्वी गति बैशाख खुणि उर्येण वल़ो इगासर कौथिग ये साल बड़ा धूमधाम से मनये गे। ये साल यो आयोजन द्वी दिन तक चले जैमा लोकगीत- संगीत, नृत्य-गायन का दगड़ै-दगड़ स्थानीय जनमानस द्वारा कतनै कार्यक्रम आयोजित करे गैनि।
मेला समिति का सदस्यों अर क्षेत्र का गणमान्य लोगों द्वारा मनोकामना सिद्धपीठ एकेश्वर महादेव की पूजा अर्चना का दगड़ ये कौथिग को शुभारंभ ह्वे। ये मौका पर कतनै रंगारंग कार्यक्रमों को आयोजन करेगे। प्रसिद्ध जागर गायिका हेमा नेगी करासी अर लोकगायक सौरभ मैठाणी द्वारा लोक गीतों गयै गेनि। हेमा नेगी न् कार्यक्रम की शुरुआत भगवान बद्री विशाल की स्तुति जागर से करे। वेका बाद वूंन माँ भगवती नंदा जागर, भोले शंकर की स्तुति गै। वूंन आछरी जागर अर गिर गेंदवा गीत बि गै।
लोक गायक सौरभ मैठाणी न् अपणा गीतों की शुरुआत एकेश्वर महादेव की स्तुति भोले नाथ का भजन से करे। येका बाद वूंन् हिट बिन्दुली धार बुग्याल, वख़ी मेरू गांव, तू रेन्दी मा उच्चा पहाड़ मा आदि गीतों की प्रस्तुति दे। वूंका चर्चित गीत ‘मैं पहाड़ू कु रैबासी को लोगों खूब आनंद ल्हे।
गीत संगीत पर नवीन नेगी अखिल मेंदोला न् पियानो, रोहित न् ढोलक, वीरेंद्र पवन न् ढोल दमाऊ पर संगत करे। साथी कलाकार का रूप मा दिगम्बर धीमान अर प्रीति कोहली, सचिन धीमान मंच पर छया।
ये कार्यक्रम मा मेला समिति का अध्यक्ष नरेंद्र नेगी न् ये कौथिग तैं उर्याण का वास्ता दानदाताओं, दगड़्यों, शासन प्रशासन अर मीडिया कर्मियों को धन्यवाद करे। वूंन बोले कि इग़ासर कौथिग सर्या चौंदकोट क्षेत्र की पछ्याण छ। इलै येको संरक्षण भौत जरूरि छ।
कौथिगा पैला दिन 40 ग्राम सभाओं का महिला मंगल दल अर स्वयं सहायता समूहों द्वारा पारंपरिक लोक नृत्य व सांस्कृतिक झांकियों को प्रदर्शन करेगे। झांकी अर लोकनृत्य प्रतियोगिताओं का निर्णायक आशीष नेगी, नरेश सुंदरियाल, सरिता जोशी अर मनोज भट्ट छया।
ये कौथिग मा मेला समिति का अध्यक्ष नरेंद्र नेगी, जिला सहकारी बैंक का अध्यक्ष नरेंद्र नेगी (कुट्टी भाई), ब्लाक प्रमुख एकेश्वर नीरज पांथरी, जिला पंचायत अध्यक्ष शांति देवी, जिला पंचायत सदस्य आरती नेगी, संजय डबराल मिंटू, नगर पंचायत अध्यक्ष सतपुली जितेंद्र चौहान,योगम्बर सिंह नेगी, व्यापार मंडल अध्यक्ष सुनील रावत, प्रकाश जदली, पंकज पोखरियाल का दगड़ै-दगड़ कतनै लोग पौंछ्यां छया। कार्यक्रम को संचालन गणेश खुगशाल गणी द्वारा करेगे।
