भिलंगना ब्लॉक की हिंदाव पट्टी मा ‘लक्ष्य पुरस्कार 2025’ कार्यक्रम, 182 मेधावी छात्र-छात्रा सम्मानित
मतकुड़ीसैंण (टिहरी गढ़वाल) l विद्यालयी शिक्षा मा उत्कृष्ट प्रदर्शन करण वाळा छात्र-छात्राओं तैं प्रोत्साहित करण अर होसला बढ़ोण की मंशा सि चन्द्रमा प्रोडक्शन द्वारा टिहरी गढ़वाल जिला का भिलंगना ब्लॉक की हिंदाव पट्टी का अंतर्गत कक्षा 1 से 12 तक का हर स्कूल का हर कक्षा का टॉपर बालक -बालिका तैं सम्मानित कर्ये गै l
यु भव्य कार्यक्रम अटल उत्कृष्ट राजकीय इंटर कॉलेज, मतकुड़ीसैंण मा आयोजित ह्वे । ‘लक्ष्य पुरस्कार 2025’ के अंतर्गत कुल 39 विद्यालयों सि चुन्यां 182 हुस्यार अर प्रतिभावान छात्र-छात्राओं तैं प्रशस्ति पत्र, स्मृति चिह्न अर पुरस्कार भेंट कर्ये गै l
ख़ास बात य बि रै कि कक्षा 10, 11 अर 12 का टॉपर्स बच्चों तैं लैपटॉप दिये गिन जैसि सि अपणी पढाई मा डिजिटल साधन्यूकु उपयोग करि सकुन l कार्यक्रम मा मुख्यशिक्षाधिकारी टीरि शिव प्रसाद सेमवाल, खंड शिक्षाधिकारी भिलंगना सुमेर सिंह कैंतुरा, शिक्षाविद आचार्य सच्चिदानंद जोशी, संगीतकार संजय कुमोला, पत्रकार राजेश पोल खोल बहुगुणा,केप्टेन केदार सिंह, शिक्षक लक्ष्मी प्रसाद अंथवाल, एक्टिविस्ट विनोद बडोनी, प्रधानाचार्य मनवर सिंह रावत सहित शिक्षा अर हौर बि क्षेत्रों सि जुड्यां लोगु कि गरिमामयी उपस्थिति रै l
स्कूल का बच्चों का बीच पलायन अर नशा मुक्ति पर कविता, गीतों अर नाटकों कि प्रतियोगिता बि ह्वे जैमा हर विधा मा 5100,3100 अर 2100 कु इनाम बि दिये गै l गिरीश बडोनी, कुंवर सिंह नेगी अर प्रमिला मैठाणीन निर्णायकों कि भूमिका निभै l कार्यक्रम मा मीना राणा, बीना बोरा, ललित रावत, करण सिंह रगड़वाळ तैं उचित धनराशि,अभिनंदन पत्र अर मोमेंटो का साथ विभिन्न क्षेत्रों मा उल्लेखनीय भूमिका का खातिर सम्मानित कर्ये गै l शिक्षक ह्रदय राम अंथवाल तैं मरणोपरांत सम्मानित कर्ये गै l यु सम्मान तौँकि पत्नी आशा देवीन ग्रहण करे l
कार्यक्रम कु संचालन प्रशांत गंगोडिया अर दीपक कैंतुरान करे l कार्यक्रम मा विक्रम घणाता, अंकित रावत, डॉ उर्मिला रावत, भरत रावत अर हिमसी रावत कि विशेष भूमिका रै l चन्द्रमा प्रोडक्शन का मालिक दर्शनी रावत अर बचन सिंह रावतन पूरा कार्यक्रम मा सबि बच्चों अर मेमानु कु उत्साह बढ़ाई अर सम्मान करे l बचन सिंह रावत कोरोना, आपदा अर अन्य मौकों पर बि लोगों कि मदद करदि रैन अर जरूरतमंद का दगड़ा खड़ा रंदन l निश्चित रूप सि लक्ष्य अवार्ड्स 2025 कु यु आयोजन अपना आप मा यु अनोखु आयोजन रै l
