कवि कन्हैयालाल डंडरियाल जी की पुण्यतिथि पर कार्यक्रम

गढ़वाल़ी भाषा का सुप्रसिद्ध कवि कन्हैयालाल डंडरियाल जी की 21वीं पुण्यतिथि पर डंडरियाल विकास एवं सामाजिक कल्याण समिति का तत्वाधान मा देहरादून का उत्तराचंल प्रेस क्लब मा एक कार्यक्रम उर्ययेगे। द्वी चरणों मा आयोजित ये कार्यक्रम का प्रथम चरण मा कन्हैयालाल डंडरियाल जी का व्यक्तित्व अर कृतित्व पर सविस्तार चर्चा ह्वे। जबकि दुसरा चरण मा कवि सम्मेलन का माध्यम से डंडरियाल जी तैं काव्यांजलि दियेगे।

कार्यक्रम की शुरुआत कन्हैयालाल डंडरियाल जी तैं श्रद्धा सुमन का दगड़ ह्वे। ये का बाद डंडरियाल विकास एवं सामाजिक कल्याण समिति का उपाध्यक्ष जी द्वारा अतिथियों को स्वागत करेगे। स्वागत संबोधन का बाद आशीष सुंदरियाल न् डंडरियाल जी का व्यक्तित्व अर कृतित्व पर विस्तार से अपणो व्यक्तव रखे गे। वूंन बोले कि डंडरियाल जी व्यक्तित्व असाधारण अर कृतित्व अद्वितीय छौ। कार्यक्रम मा मुख्य अतिथि का रूप मा उपस्थित उत्तराखंड का पूर्व मुख्यमंत्री अर पूर्व केन्द्रीय शिक्षा मंत्री डॉ रमेश पोखरियाल ‘निशंक’ कन्हैयालाल डंडरियाल जी दगड़ बितयां दिनो तैं याद करे। वूंन बोले कि कन्हैयालाल डंडरियाल हमरि थाति का कालजयी रचनाकार छन। हमतैं वूंका साहित्य को हिंदी मा बि अनुवाद कर्न चयेंद। डंडरियाल जी दगड़ एर लंबो समै बिताण वल़ा जयपाल सिंह रावत जीन् बि डंडरियाल जी से जुड़्यां संस्मरण साझा करीन्।

कार्यक्रम का दुसरा भाग मा कविता पाठ को आयोजन ह्वे जैमा कवियों न् कुछ डंडरियाल जी की कविताओं को पाठ करे त दगड़ मा अपणि रचना सुणेनी। कवियों मा मदन मोहन डुकलाण, ओम प्रकाश सेमवाल, रामकृष्ण पोखरियाल, बीना कंडारी, शांति अमोली बिंजोला, जयपाल सिंह रावत, जगमोहन सिंह रावत आदि न् कविता पाठ करे। कवि सम्मेलन को संचालन बीना बेंजवाल जीन् करे।