उत्तराखण्ड- नंदा राजजात यात्रा -2026 की तैय्यरि जोर-शोर से शुरू

मुख्यमंत्री श्री पुष्कर सिंह धामी न् मंगलवार खुणि अधिकारियों तैं नंदा राजजात यात्रा 2026 का सुचारू संचालन का वास्ता खास निर्देश देनि। वूंन् बोले कि  उत्तराखण्ड मा 2026 मा होण वल़ि नदां देवी राजजात यात्रै सब्बि तैय्यरि मा तेजी ल्हये जावा। भव्य नंदा राजजात यात्रा का आयोजन का वास्ता सब्बि विभाग आपस मा मिलि-बांटिक काम-धाणि छंट्येन्। यात्रा की भल्लि व्यवस्थाओं का वास्ता जन प्रतिनिधियों, नंदा राजजात यात्रा समिति की सदस्यों अर हितधारकों का सुझाव ल्हये जैं। यो निर्देश मुख्यमंत्री धामी न् मंगलवार खुणि वर्चुअल बैठक का दौरान अधिकारियों तैं देनि।

मुख्यमंत्री न् मुख्य सचिव तै निर्देश दे कि नंदा राजजात यात्रा का सफल संचालन खुणि एक उच्च स्तरीय समिति को गठन करा। पिछलि यात्राओं का अनुभवों को ध्यान धरीक बेहतर व्यवस्थाओं को प्रबंध करे जावा। यात्रा का पड़ाव पर श्रद्धालुओं का वास्ता बासा रैणा प्रबंध का दगड़ै-दगड़ भोजन अर स्नान घरों की व्यवस्था बि करे जावा। मुख्यमंत्री न् बोले कि यात्रा मार्ग पर दूरसंचार की व्यवस्थाओं का दगड़ै-दगड़ डिजिटल ट्रेकिंग सिस्टम बि बणये जा। ऊन् बोले कि यात्रियों की सुरक्षा का वास्ता यात्रा का दौरान हेल्पलाईन नंबर जारी करे जा। मेडिकल कैंप अर चिकित्सकों की बराबर व्यवस्था करे जा। यात्रा का दौरान हेली एम्बुलेंस की व्यवस्था भि हो।

मुख्यमंत्री न् यो बि बोले कि नंदा राजजात से संबंधित लोक गीत अर लोक कथाओं को अभिलेखीकरण बि करे जा। वूंन् बोले कि यात्रा मार्गों पर पेयजल, शौचालय अर अन्य मूलभूत सुविधाओं को खास ख्याल रखे जावा।

मुख्यमंत्री जीन् मुख्य सचिव तैं बोले कि वो हर मैना नदां राजजात यात्रा की तैयारियों की समीक्षा करीन्। गढ़वाल अर कुमांऊ आयुक्त भी हर हफ्ता यात्रा से संबंधित तैयारियों की समीक्षा कारला।

उत्तराखण्ड मा हैंक्का साल होण वल़ि 280 किमी की ऐतिहासिक नदां देवी राजजात यात्रा का भव्य आयोजन अर श्रद्धालुओं की सुविधा का वास्ता ये सब्बि इंतजाम होणा छन।