भारत सरकार द्वारा ‘साधना स्वायत्त सहकारिता’ संगठन, पौड़ी तैं ‘आत्मनिर्भर संगठन पुरस्कार – 2024’ मिलण छ। 15 अगस्त 2025 मा देश का प्रधानमंत्री नरेन्द्र मोदी जीन् ये संगठन का कर्ता-धर्ताओं तैं लाल किले मा आयोजित एक कार्यक्रम मा सम्मानित कारला।
‘साधना स्वायत्त सहकारिता’ संगठन, पौड़ी की ग्रामीण महिलाओं को एक समूह छ जो सामाजिक अर आर्थिक स्वालंबन का क्षेत्र मा 2021 बटि काम कर्नू छ। साल 2021 बटि अब तक, डेयरी उद्योग से साधना स्वायत्त सहकारिता की लगभग ₹81 लाख की कमै ह्वे, जैमा ₹ 4.60 लाख नफा ह्वे। यो संगठन एक कैफे को बि चलांद, जै से साल 2023 से अब तक ₹9 लाख कमै ह्वे जैमा ₹3.20 लाख को संगठन तै नफा ह्वे। ये आँकड़ा जरूर आस-विश्वास बढ़ौण वल़ा छन।
‘साधना स्वायत्त सहकारिता’ संगठन, पौड़ी की या जात्रा राष्ट्रीय ग्रामीण आजीविका मिशन अर सहयोगी संस्था हिमोथान सोसाइटी, टाटा ट्रस्ट का कट्ठा जतन से साल 2021 मा शुरू ह्वे, जब विकासखंड पौड़ी मा 6 क्लस्टर लेवल फेडरेशन (सीएलएफ) बणये गे। यूं मदे हि एक छ- ‘साधना स्वायत्त सहकारिता’, जैन्जैन् ग्रामीण महिलाओं की कमै पर खास ध्यान दे अर महिलाओं का सामाजिक अर आर्थिक सशक्तिकरण का वास्ता भल्लो काम करे।
15 अगस्त 2021 खुणि मंत्री सुबोध उनियाल न् सहकारिता की डेयरी यूनिट को उद्घाटन करे । शुरू मा 2 ग्राम पंचायतों बटि महिलाओं न् यीं पहल मा भागीदारी के, जो मट्ठु-मट्ठु कै 5 ग्राम पंचायतों पसरि गे। आज यीं सहकारिता का माध्यम से 206 ग्रामीण महिलाएं रोज मिलि-जुलिक दूध मेटिकी डेयरी यूनिट मा पौंछाणी छन। पशुपालन अर दूध विक्रय से यूं महिलाओं तैं पैंसा-पल्ला का हिसाब से खूब दड़ मिलणू छ।
इन्नि, 15 सितम्बर 2023 खुणि सांसद तीरथ सिंह रावत न् “दीदी कैफे यूनिट” को उद्घाटन करे। ये कैफे मा समूहै महिला पारंपरिक पहाड़ी व्यंजनों बणैकी स्थानीय लोगों अर पर्यटकों खिलांदिन। यां से न केवल क्षेत्रीय संस्कृति अर खानपान तैं पछ्याण मिलणी छ, बल्कि यांसे महिला समूह तै एक नया स्वरोजगार को जरिया बि मिलिगे।
इना हि सब्बि जतनों को हि सुफल छ कि भारत सरकार ‘साधना स्वायत्त सहकारिता’ संस्था तैं ‘आत्मनिर्भर संगठन पुरस्कार – 2024’ देणी छ। जनोक कि पैलि बतै कि 15 अगस्त 2025 खुणि देश का प्रधानमंत्री नरेन्द्र मोदी न् ये संगठन तैं लाल किले पर हूण वल़ा एक कार्यक्रम मा यूं गौं की साधारण महिलाओं की मीनत को ईमाम-किताब देण। । यो सम्मान केवल एक संस्था का वास्ता, बल्कि पूरा पौड़ी विकासखंड, जनपद अर उत्तराखण्ड राज्य का वास्ता हर्ष अर गौरव को विषय छ।
