- गढ़वाळि मा औखाणू घलदिन लोग बल कुछ कळ्ना अर कुछ करतूत, जै खुणि आजा हिसाब से बोलि सकदन कि कुछ प्रतिभा अर कुछ मेहनत। या बात अपणा असल जीवन मा चरितार्थ करि रुद्रप्रयाग का बीरौं देवलगॉंव का अतुल कुमार न्। अतुल एक सामान्य परिवार बटि औंद अर वे तैं अपणि मेहनत का दम पर देश का प्रतिष्ठित भारतीय प्रोद्योगिकी संस्थान, मद्रास मा दाखिला ल्हेण मा सफलता मिलिगे।
अतुल एक भौत साधारण परिवार बटि औंद। तैका मॉं-पिताजी आजीविका का वास्ता आज बि केदारनाथ धाम मा घोड़ा-खच्चर चलौंदिन। परिवारै आर्थिक स्थिति भौत बढ़िया नी छै त स्कूलै पढ़ै का दगड़ै-दगड़ अतुल बि हर साल केदारनाथ मा खच्चर चलौण मा अपणा परिवार की मदद करदु छौ।
पढ़ै-लिखै का मामला मा अतुल शुरू बटे हि तेज छौ। बोल्दन बल हुणत्यळि डाळ्या चलचला पात। वेका 10वीं मा 94.8% अर 12वीं मा 92.8% नंबर ऐनि अर पूरा उत्तराखंड मा टॉप रैंक ऐ। आज वो हेमवती नंदन बहुगुणा गढ़वाल विश्वविद्यालय, श्रीनगर मा BSc अंतिम वर्ष मा पढ़णू छ।
जीवन मा इतगा खैरि अर कठणै होणा बावजूद बि वेन् IIT JAM 2025 परीक्षा द् — अर All India Rank 649 हासिल करि। अब वेतै MSc Mathematics मा IIT मद्रास मा दाख़िला मिलणू छ।
गौं-त्यखड़ि या फिर जिला-प्रदेश मा जो बि यीं खबर तैं सुणणू छ, भौत खुश होणू छ अर अतुल तैं खूब आसिरवाद देणू छ। लोग ब्वना छन कि कबि अतुल का जौं हाथ मा खच्चर की रस्सि हूंदि छै, आज तौं हाथों मा भारत का सबसे प्रतिष्ठित संस्थान को एडमिशन लेटर छ। वेका वास्ता अर पूरा परिवार अर क्षेत्र का वास्ता ये से बड़ि बात क्य ह्वे सकदि।
