‘बीज बचाओ आंदोलन’ का कर्णधार विजय जड़धारी जी तैं दियेगे तृतीय इंद्रमणि बडोनी स्मृति सम्मान

इंद्रमणि बडोनी चैरिटेबल फाउंडेशन द्वारा ये साल 2025 को इंद्रमणि स्मृति सम्मान ‘बीज बचाओ आंदोलन’ का कर्णधार विजय जड़धारी जी तै दियेगे। दून लाइब्रेरी देहरादून मा इंद्रमणि बडोनी जी की 26वीं पुण्यतिथि पर दिनांक 18 अगस्त 2025 मा आयोजित एक कार्यक्रम मा यो सम्मान श्री जड़धारी जी तैं दियेगे। ये कार्यक्रम मा गढ़रत्न नरेंद्र सिंह नेगी जी मुख्य अतिथि अर मैती आंदोलन का राग-जग्वळ्या पदमश्री कल्याण सिंह रावत जी विशिष्ट अतिथि का रूप मा मौजूद छया। कार्यक्रम की अध्यक्षता सच्चिदानंद जोशी जीन् करे।

ये पुरस्कार मा विजय जड़धारी जी तैं स्मृति चिह्न, सम्मान पत्र अर ₹51000 की सम्मान राशि भेंट करेगे। ये मौका पर जड़धारी जीन् बोले कि पारंपरिक खेती का उत्पादन से एक स्वस्थ जीवन जिये सकेंद। वून् बोले कि पैलि जो पढ्यॉं-लिख्यां या वैज्ञानिक लोग हमरा पारंपरिक नाज तैं ‘मोटू अनाज’ बोलिक एक किनारा करि देंद छया वो आज जैविक अनाज की वकालत कर्ना छन।  विजय जड़धारी जी से पैलि यो सम्मान 2023 मा इंद्रमणि बडोनी जी का केदार नृत्य मा सहयोगी ढोलवादक शिवजनी जी तैं अर 2024 मा गढ़रत्न नरेंद्र सिंह नेगी जी तैं दियेगे छौ।

ये मौका पर स्व इंद्रमणि बडोनी जी का व्यक्तित्व अर कृतित्व पर एक पुस्तक ‘इंद्रमणि बडोनी और उत्तराखंड’ को बि विमोचन ह्वे। ईं पोथि का लेखक गिरीश बडोनी अर अनिल सिंह नेगी छन। पुस्तक का बारा मा अनिल सिंह नेगी जीन् बोले कि हमारि कोशिश रै कि जो बि जानकारी हो वो प्रामाणिक हो।

कार्यक्रम का अंत मा धराली आपदा मा मृतक आत्माओं की शांति का वास्ता द्वी मिंटौ मौन बि रखेगे।

कार्यक्रम मा काफी लोग देहरादून अर दूर पहाड़ बटि पौंछ्यां छया हॉल मा खूब भीड़ ह्वेगे छया। कार्यक्रम को सैज संचालन शिक्षक गिरीश बडोनी जी द्वारा करेगे।