महाकवि कन्हैयालाल डंडरियाल जी की 92वीं जयंती पर वूंकि जन्मस्थली चौन्दकोट गढ़वाल मा ‘मेरु मुलुक’ संस्था द्वारा एक कार्यक्रम करेगे। ये कार्यक्रम मा डंडरियाल जी का व्यक्तित्व अर कृतित्व पर चर्चा अर कवि गोष्ठी को आयोजन करेगे।
मॉं ज्वाल्पा होम स्टे, नौंगॉंवखाल मा आयोजित ये कार्यक्रम को शुभारंभ मंचासीन अतिथियों द्वारा दीप प्रज्वलित कर्न का दगड़ ह्वे। येका बाद वरिष्ठ कवि अर चिट्ठी-पत्री का संपादक मदन मोहन डुकलाण न कन्हैयालाल डंडरियाल जी का व्यक्तित्व अर कृतित्व पर विस्तार से बतै। ये मौका पर राजकीय इंटर कॉलेज नौंगॉंवखाल का बच्चों- अंश, अपराजित, रितिका, हिमींशी, दीपाशी न् डंडरियाल जी का गीत व कविता को पाठ करे।
ये कार्यक्रम को पैलो भाग डंडरियाल जी का व्यक्तित्व अर कृतित्व तैं समर्पित छौ। कार्यक्रमा दुसरा भाग मा कवि गोष्ठी को आयोजन करेगे जैमा गढ़वाल का जगा-जगा बटि अयां कवियों न् भाग ल्हे। गोष्ठी को आरंभ शिक्षिका व कवियत्री पूनम रावत का गीत से ह्वे जैमा उत्तराखंड की महान धरती को गुणगान करेगे। येका बाद रंगकर्मी व कवि विजय मधुर न् रजत जयंती मनाणा का बावजूद भि गॉंव मा मूलभूत सुविधाओं की अभाव को जिक्र अपणि कविता मा करे। ये मौका पर स्थानीय कवि व पूर्व सैनिक सत्यपाल सिंह रावत जी न् अपणि कविता ‘ब्वे’ प्रस्तुत करे। युवा कवि दिवाकर बुडाकोटी न् शानदार गजल सुणै। आशीष सुंदरियाल न् अपणि द्वी ननि-ननि कविता को वाचन करे। रंगकर्मी व नाटककार कुलानंद घनशाला न ‘क्य होलो तब’ रचना को पाठ करे। कवि रमेश भट्ट न् समाज मा आज की स्थिति को चित्र प्रस्तुत करे। कोटद्वार बटि पहुँच्या कवि व गीतकार यतींद्र गौड़ न् अपणौ गीत प्रस्तुत करे। कवि राकेश मोहन खंतवाल न् बाळापन की यादों तै अपणा गीत का माध्यम से ताजा करि। शिक्षक व कवि धर्मेंद्र नेगी न् पहाड़ की आजै स्थिति पर केंद्रित अपणि रचना सुणै। रंगकर्मी व कवि-गीतकार मदन मोहन डुकलाण न् राज्य बणणा 25 साल बाद भी अपेक्षित विकास नि ह्वे – अपणि रचना का माध्यम से प्रकट करे। कार्यक्रम संयोजक व कवि-गीतकार गिरीश सुंदरियाल न् बी 25 सालों मा पहाड़ो की उपेक्षा तै अपणा गीत का माध्यम से उठै।
ये कार्यक्रम मा पोखड़ा ब्लॉक का उप शिक्षा अधिकारी श्री जोशी जी, जेष्ठ प्रमुख ऐकेश्वर मुकेश पांथरी, जिला पंचायत सदस्य पूनम कैंतुरा, सामाजिक कार्यकर्ता कवींद्र इष्टवाल, महीपाल सिंह नेगी, भगत सिंह रावत, सुरेंद्र सिंह रावत, स्थानीय राजकीय इंटर कॉलेज का प्रधानाचार्य श्री रावत जी, मेरु मुलुक का सदस्य राजेंद्र सिंह रावत, हिम्मत सिंह राणा, विकास पांथरी, नवीन बिज्वाण आदि क्षेत्र का गणमान्य लोग उपस्थित छया।
