देहरादून मा राजपुर रोड़ वल़ा ऐतिहासिक राष्ट्रपति आशियाना तैं हैक्का मैना जून बटि आम जनता बि देख सकद। राष्ट्रपति श्रीमती द्रौपदी मुर्मू न् 20 जून खुणि येको विधिवत् उद्घाटन कर्न। राष्ट्रपति सचिवालया अपर सचिव डॉ. राकेश गुप्ता न् गुरुवार खुणि ये बाबत तैयारि का संबंध मा एक उच्च स्तरीय बैठक करे अर सम्बंधित कामों तैं बगत पर पूरा कर्ना निर्देश दीने। अपर सचिव डॉ. गुप्ता न् राष्ट्रपति आशियाना परिसर का 132 एकड़ क्षेत्रफल मा अत्याधुनिक पार्क, 19.5 एकड़ भूमि पर लोवर एस्टेट अर 21 एकड़ भूमि मा बण्यां राष्ट्रपति आशियाना मा संचालित नवनिर्माण कार्याे की प्रगति समीक्षा करे अर राष्ट्रपति का प्रस्तावित रैबसा से पैली सब्बि तैयारियों तै पूरा कर्नो बोले।
अपर सचिव डॉ. राकेश गुप्ता न् बोले कि राष्ट्रपति उत्तराखंड तैं एक बड़ि समूण देण वल़ि छन। देहरादून वल़ो राष्ट्रपति आशियाना जख पैलि बार आम जनता का वास्ता खोले जालो, वखि आशियाना परिसर मा बणण वल़ा अत्याधुनिक पार्क से देहरादून का ग्रीन स्पेस (हरा-भरा स्थान) मा बि बढ़त होलि। यांसे पूरा शहर अर आम लोगों तैं फैदा मिललो। वूंन् बोले कि आशियाना परिसर मा 132 एकड़ भूमि पर अत्याधुनिक पार्क तैयार करे जाणू छ। माननीय राष्ट्रपति 20 जून खुणि येकि पौ धारलि। जो हैंका साल तक तैयार ह्वे जालो।
विश्व स्तरीय सुविधाए, नै-नै डिजाइन, टिकाऊ व्यवस्थाओं का दगड़ै-दगड़ यो पार्क हरियाली, स्वास्थ्य अर सांस्कृतिक कार्यक्रम का वास्ता बि प्रमुख केंद्र होलो। राष्ट्रपति आशियाना भवन परिसर मा मैमानों खुणि सुविधा केंद्र, एम्फीथिएटर, कला प्रदर्शन, कैफेटेरिया, स्मारिका स्टोर, घोड़ों को अस्तबल का दगड़ भौत कुछ हौरि बि जनता का वास्ता द्यखणौ होलो।
राष्ट्रपति आशियानै स्थापना खास 1838 मा गवर्नर जनरल का अंगरक्षक का घ्वाड़ो अर सवारों खुणि रूड्यों का वास्ता ह्वे छई। दिल्ली की गर्मी से बचणा वास्ता घ्वाड़ा मई से जुलाई तक यख रैंदा छया। आजादी का बाद यो क्रम राष्ट्रपति का अंगरक्षक न् जारी रखे। आशियाना भवन तैं 1920 मा अंगरक्षकों का कमांडेंट का वास्ता बणये गे छयो अर ये तैं कमांडेंट को बंगला ब्वले जांदो छयो। 1975-76 मा राष्ट्रपति फखरुद्दीन अली अहमद का वास्ता शिमला का ग्रीष्मकालीन निवास का विकल्प की रूप मा ये एस्टेट अर भवन तै राष्ट्रपति निवास मा बदल दिये गे । 1976 मा बंगला को नाम बदलिक राष्ट्रपति आशियाना धैरेगे, यो नाम धर्नो सुझाव प्रथम महिला बेगम आबिदा अहमद न् दे छयो। ये आशियाना मा अबि तक राष्ट्रपति अहमद, नीलम संजीव रेड्डी , जैल सिंह अर के.आर. नारायणन रैनि, येका बाद आशियाना बंद ह्वेगे छौ। बाद मा येको जीर्णोद्धार करेगे अर 2016 मा राष्ट्रपति प्रणब मुखर्जी न् येको उद्घाटन करे।
उत्तराखंड देहरादून मा बण्यूं यो भवन भारत मा तीन राष्ट्रपति निवासों मदे एक छ, हौरि द्वी हैदराबाद मा राष्ट्रपति निलयम अर शिमला मा राष्ट्रपति निवास छ।
