रिपोर्ट: बलबीर सिंह राणा
सीखा बाबू दुन्याँ कि भाषा/ तरक्की कोरा तुम ही च आसा/ पर अपणी भाषा ना छवाड़ा/ ये भाषा तुमरा जलड़ा जम्यां छाँ/ दुन्यां मा तुमरि पच्छयाण रैली/ तुमु मा ह्वेली अपणी भाषा।
यु पंक्तियाँ छन साहित्यकार बलबीर राणा अडिग की, अडिग को बोलणू छ कि भाषा परिप्रेक्ष्य मा जख हम वैश्विक होणा छन वखि हमरि मातृभाषा हमसे छूटणि, आज जरुरत अर जरूरी चा अपणि भाषा अपणि पछयांण का खातर हर गढ़वळी तैं अपणि “म्यौलाख” देणे। अर म्यौलाख ह्वेलि मात्र अपणि भाषा मा बच्याणे, अर यु अभिव्यक्ति को अवसर छौ, 
25 मई 2025 उणि कलम क्रांति साहित्यिक मंच (पंजी) गोपेश्वर मा “माँ सरस्वती सम्मान समारोह को, ये आयोजन मा 50 साहित्यकारों दगड़ जिला मा संस्कृति, पर्यावरण शिक्षा अर हौरि क्षेत्र मा अतिविशिष्ट काम कन वळा प्रतिभाओं तैं सम्मानित करेगे, कार्यक्रम का मुख्य अथिति श्री सुनील पाठक, अखिल भारतीय साहित्य परिषद, श्रीनगर बिटे आखर ट्रस्ट का संस्थापक वरिष्ठ साहित्यका श्री संदीप रावत, राज्य आंदोलनकारी श्रीमती मनीषा रावत, शिक्षक अर प्रेरणा मोटिवेशनल स्पीकर श्रीमती बबीता थपलियाल जी छा। विशिष्ट अथिति मा पर्यावरण मित्र श्री धन सिंह घरिया (पेड़ वाले गुरूजी) लोक गायिका पम्मी नवल, रंग कर्मी विजय वशिष्ठ, ऊषा रावत, सुनील नाथन अर मोहन नेगी छा।
ये सुअवसर पर बलबीर राणा अडिग, ज्योत्सना जोशी, दमयंती भट्ट, अजय नोटियाल, राजपाल सिंह पंवार, शाइनी कृष्ण उनियाल, सतेन्द्र बर्तवाल आदि कवियूँल काव्य पाठ करे। कार्यक्रमों संचालन हिमांशु थपलियाल, डॉ दर्शन सिंह नेगी, लोकेंद्र रावत अर ललित मोहन किमोठिल मिल-जुली करि, समारोह का मुख्य वक्ताओं मा अथितियों का दगड़ कलम क्रांति साहित्यिक मंचै अध्यक्षा डॉ श्रीमती शशि देवली जिन अपणु उद्धभोदन करि, याँका दगड़ बाळखिला भोटिया जनजाति महिला मंगगलदल, गोपीनाथ नाट्य अर संगीत संस्थान, लोक गायिका पम्मी नवलन अपणि प्रस्तुति दे दर्शकों तैं बांधि रखी, कार्यक्रम मा जख कलम क्रांति साहित्यिक मंचै अध्यक्षा डॉ श्रीमती शशि देवली, उपाध्यक्ष श्री दीपक सती प्रसाद, सचीव डॉ दर्शन सिंह नेगी, संरक्षक डॉ भगत राणा हिमाद, श्रीमती ज्योति विष्ट, बलबीर राणा अडिगन महति भूमिका निभैन वखि मंच का हौरि साहित्यकारोंन उपस्थिति दे अपणि म्यौलाख दिनी। कार्यक्रम संयोजक डॉ शशि देवली जिन अपणा संबोधन मा सब्यूँ को धन्यवाद प्रेषित करि अर प्रतिबद्धता जतै कि समाज, साहित्य अर संस्कृति का क्षेत्र मा काम कन वळा लोगों तैं कलम क्रांति मजबूत मंच ध्यूलौ। समारोह मा चमोली जिला का जनसरोकारों से जुड़याँ प्रबुद्ध लोगों अर मिडिया भै-बन्दों कि गरिमई उपस्थिति रये।
