लेखक अर समीक्षक देवेश जोशी की पुस्तक ‘गढ़वाल अर प्रथम विश्वयुद्ध’ का दुसरा संस्करण को लोकार्पण गढ़वाल राइफल सेंटर, लैंसडाउन मा ब्रिगेडियर विनोद सिंह नेगी का करकमलों से संपन्न ह्वे। ये मौका पर ब्रिगेडियर नेगी न् बोले कि यीं पुस्तक का कतनै इनि जानकारी छन जो ये से पैली लोगूं तै पता नि छै। वूंन बोले कि या पुस्तक ‘गढ़वाल’ रेजिमेंट का वास्ता एक श्रेष्ठ पुस्तक छ अर यीं पोथि मा लोकगीत का कुछ कुछ संदर्भ इना छन जो हमतैं पैलि बार पता लगणा छन।
अपणि पुस्तक का बारा मा बतौंदि बेर पुस्तक का लेखक देवेश जोशी जीन् बोले कि यीं पुस्तक तै लिखणै प्रेरणा वूंतै ‘ सात समोदर पार जाण त ब्वे’ जना लोकगीत तै सुणणा बाद मिले जो तौन् नरेंद्र सिंह नेगी जी का स्वर मा सूणि छौ। प्रकाशक कीर्ति नवानी जीन् बोले कि या पुस्तक पाठकों द्वारा काफि पसंद करे जाणी छ। अर या खुशी कि बात छ लगभग साल भर का भितर हि पुस्तक को दुसरो संस्करण बि ऐगे।
ये मौका पर लेखक, पत्रकार व कुशल मंच संचालक गणेश खुगशाल ‘गणी’ बोले कि या पुस्तक देवेश जोशी द्वारा बिल्कुल अलग ढंग से ल्यखीं छ अर साहित्य व इतिहास को सुंदर संगम हमतै यीं पुस्तक मा द्यखणौ मिल्द।
