देहरादून। दून विश्वविद्यालय का रंगमंच विभागन एक नाट्य समारोह को आयोजन करि।ये नाट्य समारोह मा द्वी नाटक मंचित करे गेनि। पैलु नाटक ग्रीक नाटक युरिपीडिज लिखित ट्रोजन विमिन छयो जैको निर्देशन डॉ अजीत पंवारन अर हैंको नाटक बसंत सबनीस कृत छयो जैको निर्देशन कैलाश कंडवालन करि।
ये नाट्य समारोह को शुभारंभ दून विश्वविद्यालय कि कुलपति प्रो० सुरेखा डंगवालन द्यू जळैकि करि।
ये मौका पर कुलपति प्रो. सुरेखा डंगवालन बोलि कि नाटक हमुतैं समाजिक बणौंदु। रंगमंच व्यक्तित्व विकास को बि एक सशक्त माध्यम छ। यूं नाटकु मा सबि पात्रोंन अपड़ि भूमिका भलि कै निभैनि।
नाट्य समारोह मा मंचित ट्रोजन विमिन नाटक एक दुखान्त नाटक छ।यु ट्राय शहरै जनान्यूं का दुख अर संघर्ष कि कथा को बखान करद। “ट्रॉय” नगर की पराजय अर उखै राण्यों, राजकुमार्यूं अर जनान्यूं कि पीड़ा ये नाटक मा साफ दिख्येंद।यु नाटक लड़ै कि क्रूरता,नारी वेदना और भाग्य कि निर्दयता को मार्मिक चित्रण प्रस्तुत करद।ट्रोजन विमिन नाटक मा मुख्य पात्र क रूप अनन्य डोभाल,स्वाति,साक्षी देवरानी,सुमन काला ,अजेश कुमार, मनस्वी तोमर, राजेश भारद्वाज , रीता कपूर, सरिता भट्ट , सोनिया वालिया ,सरिता जुयाल, आयुष चंद्र चौहान, टेल्थीबियस, अंशुमन सिंह सजवान,अजेश कुमार, विनायक सेमवाल, लोहित्य सिंह, भाविक पटेल, प्रणव पोखरियालन महत्वपू्र्ण भूमिका निभै।
दूसरु नाटक सैंया भये कोतवाल एक हास्य स्वांग छ। जु सूरजपुर राज्य के एक राजा की कहानी पर आधारित छ।वु अपणि लापरवाही कि वजै से अपणै दरबार्यों का षडयंत्र को शिकार ह्वे जांद। ये स्वांग मा मुस्कान शर्मा, हर्षित गोयल,रजत राम वर्मा, नितिन कुमार, गणेश गौरव, फरमान न अपणि- अपणि भूमिका खूब निभैनि।
