उत्तराखंडै तीन विभूत्यूं तैं मिले पद्ममश्री सम्मान

राष्ट्रपति द्रौपदी मुर्मू न् मंगलवार खुणि दिल्ली मा उर्यां नागरिक अलंकरण समारोह मा उत्तराखंड बटि राधा भट्ट तैं सामाजिक कार्य, ह्यूग गैंट्ज़र अर कोलीन गैंट्ज़र (मरणोपरांत) तैं साहित्य एवं शिक्षा का क्षेत्र मा पद्मश्री से सम्मानित करे।

पदमश्री से सम्मानित राधा भट्ट एक प्रसिद्ध समाज सेविका छन। वो 16 सालै उम्र मा सरला बेन का आश्रम मा शामिल ह्वेगे छई। वो उत्तराखंड मा गौं-गौं जैकि महिलाओं अर बच्चों की सेवा करदिन। वूंन बेरीनाग ग्राम स्वराज्य मंडल की स्थापना बि करे। 1975 मा चिपको आंदोलनों मा बि सक्रिय रूप से भाग ल्हे। वो जमनालाल बजाज पुरस्कार, गोदावरी पुरस्कार, इंदिरा प्रियदर्शनी पुरस्कार (भारत सरकार) (पर्यावरण), मुनि संतबल पुरस्कार अर स्वामी राम मानवतावादी पुरस्कार से सम्मानित बि छन।

पदमश्री से सम्मानित ह्यूग गैंट्ज़र अर वूंकि पत्नी स्व. कोलीन गैंट्ज़र की उत्तराखंड का प्रसिद्ध यात्रा वृतांत लेखक का तौर पर पछ्याण छ। ह्यूग भारतीय नौसेना का पूर्व अधिकारी छन अर कमांडर का पद से सेवानिवृत्त छन। भारतीय नौसेना से सेवानिवृत्त का बाद ह्यूग व वूंकि  धर्मपत्नी न् यात्रा वृतांत लेखन की विशिष्ट शैली की शुरुआत करे। योंका 3,000 से ज्यादा लेख, कॉलम अर पत्रिका फीचर्स लिख्यां छन अर 30 से जादा पोथि लिखीं छन।