कवि नेत्र सिंह असवाल जी तैं मिले ‘चिट्ठी सम्मान- 2024
दगड़ मा पुस्तक लोकार्पण अर गढ़वाल़ी कवि सम्मेलन बि ह्वे
गढ़वाल़ी कविता का सशक्त हस्ताक्षर अर ‘ढांगा से साक्षात्कार’ जनि सुप्रसिद्ध कविता संग्रह का रचनाकार श्री नेत्र सिंह असवाल जी तैं इबारि दा को ‘चिट्ठी सम्मान-2024’ से सम्मानित करेगे।
यो सम्मान 15 फरवरी 2025 खुणि बालावाला,देहरादून मा आयोजित एक भव्य कार्यक्रम मा सौरभ थपलियाल, मेयर देहरादून, भाजपा युवा मोर्चा का कोषाध्यक्ष नीरज पंत, जी.आई.पी.एस का निदेशक कवींद्र इष्टवाल अर पद्म श्री कल्याण सिंह रावत की उपस्थिति मा गढरत्न नरेंद्र सिंह नेगी जी का करकमलों से असवाल जी तैं दिये गे।
ये अवसर पर द्वी पोथ्यूं – गिरीश सुंदरियाल का गीत संग्रह ‘आला उज्याल़ा दिन’ अर धर्मेंद्र नेगी का कथा संग्रह ‘थौल़ खेरैगे’ को विमोचन बि ह्वे।
ये हि कार्यक्रम मा दर्शकों से भ्वर्यां पंडाल मा एक शानदार कवि सम्मेलन बि ह्वे जैमा गढरत्न नरेंद्र सिंह नेगी, मदन मोहन डुकलाण, देवेंद्र प्रसाद जोशी, जयपाल सिंह रावत, दिनेश ध्यानी, हरीश जुयाळ ‘कुटज’, अर्चना सेमवाल, बलबीर राणा ‘अडिग’ ओम बधाणी, गिरीश सुंदरियाल, धर्मेंद्र नेगी, डॉ अनूप वीरेंद्र कठैत, राकेश जिर्वाण ‘हंस’ जना सुप्रसिद्ध कव्यूंन् अपणि रचनाओं को पाठ करे। कार्यक्रम को संचालन गिरीश सुंदरियाल अर कवि सम्मेलन को संचालन गणेश खुगशाळ गणी द्वारा करेगे।
