नवीकरण ऊर्जा का क्षेत्र मा उत्तराखंडन राष्ट्रीय स्तर पर बड़ि सफलता हासिल करि , RE-SAF दर्जा (रैंकिंग) मा दोसरा नम्बर पर।
केंद्रीय नवीन एवं नवीकरणीय ऊर्जा मंत्रालयन उत्तराखंड तैं देश का सबसे अगाड़ि रण वाळा खास दर्जा का राज्यों मा दिनि दोसरो स्थान
मुख्यमंत्री पुष्कर सिंह धामिन बोलि कि प्रधानमंत्री नरेंद्र मोदी कि देखरेख मा देश साफ ऊर्जा का क्षेत्र मा सरासर अगाड़ी बढणों छ, उत्तराखंड बि ये राष्ट्रीय करार मा निभौणो छ खास जिमदरि (योगदान)
देरादोंण। नवीकरणीय ऊर्जा का क्षेत्र मा उत्तराखंडन राष्ट्रीय स्तर पर एक खास सफलता हासिल करि। केंद्रीय नवीन एवं नवीकरणीय ऊर्जा मंत्रालय (MNRE) कि तरफां बिटिन विकसित रिन्यूएबल एनर्जी स्टेट असेसमेंट फ्रेमवर्क (RE-SAF) का हिसाब सि उत्तराखंड तैं देश का सबसे श्रेष्ठ काम करण वाळा खास दर्जा का राज्योंम दोसरो स्थान दिये गै।
केंद्रीय नवीन एवं नवीकरणीय ऊर्जा मंत्रालै का सचिव संतोष सारंगिन 31 अक्टूबर 2026 तैं मुख्य सचिव आनंद बर्द्धन तैं चिट्ठी भेजिक यिं उपलब्धि की जाणकारी दिनि। चिट्ठीम उत्तराखंड सरकार की यिं खास सफलता का वास्ता बधै दिक बोलेगे कि राज्यन नवीकरणीय ऊर्जा का विकास का वास्ता माफिक माहौल तैयार करि अर ये क्षेत्रम लगतार कोशिश करे गैई ।
यिं सफलता का वास्ता उत्तराखंड तैन 5 नवंबर 2026 तैं उर्याये जांण वाळा भारत RE समिट एवं एक्सपो-2026 का समापन सत्र मा उपराष्ट्रपति श्री सी.पी. राधाकृष्णन द्वारा सम्मानित करे जांण।
मुख्यमंत्री श्री पुष्कर सिंह धामिन यिं उपलब्धि पर खुशि ह्वेक बोलि कि नवीकरणीय ऊर्जा का क्षेत्र मा उत्तराखंड तैं मिल्यों यो सम्मान प्रदेश को पक्को ईरादो, लगन मेनथ अर पर्यावरण बचौंण कि खातिर हमारी जिम्मेदारी को प्रमाण छ। प्रधानमंत्री श्री नरेंद्र मोदी का दूरदर्शी नेतृत्व अर मार्गदर्शन मा भारत साफ ऊर्जा, ऊर्जा अफुमनिर्भर अर लगातार विकास कि तरफां फटाफट अगनै बढणों छ। प्रधानमंत्री जीन वर्ष 2030 तक 500 गीगावाट गैर-जीवाश्म ईंधन आधारित विद्युत क्षमता का राष्ट्रीय धापना रखिक देश तैं स्वच्छ ऊर्जा का क्षेत्रम नयिं दिशा दिनि। जैम उत्तराखंड बि अपणि जिमदारि सबसे अगाड़ि निभौंणो छ।
मुख्यमंत्रिन बोलि कि देवभूमि उत्तराखंड प्राकृतिक संसाधनों सि भरपूर छ। राज्य सरकार सौर ऊर्जा, जल विद्युत, लघु जल विद्युत अर हौर बि नवीकरणीय ऊर्जा स्रोतों का जादा इस्तमाल करण पर खास ध्यान देंणि छ। हमारो कोसिस छ कि स्वच्छ ऊर्जा का मारफत सि खालि पर्यावरण संरक्षण तैं बढ़ावा न मिलो, बल्कन प्रदेश की ऊर्जा जर्वतों की पूर्ति बि हो, स्थानीय स्तर पर रोजगार पैदा हो अर आर्थिक विकास बि तेजि सि हो।
वूंन बोलि कि राज्य सरकार प्रधानमंत्री जीक विकसित भारत का संकल्प कि चार/तरौं विकसित उत्तराखंड को लक्ष्य ल्हेकि काम करणि छ। नवीकरणीय ऊर्जा का क्षेत्रम मिल्यों यो राष्ट्रीय सम्मान हमतै हमारी कोशिश हौर जादा तेज करंण का दगड़ स्वच्छ ऊर्जा का विस्तार का खातिर प्रेरित कारलो।
यिं ब्यवस्था को मकसद नवीकरणीय ऊर्जा क्षेत्र मा राज्यों का अच्छा कामों तैं प्रोत्साहित करणो छ, स्वस्थ होटापैंडि तैं बढ़ावा देण अर स्वच्छ ऊर्जा का विकास का वास्ता प्रेरित करणो छ।
उत्तराखंड तैं मिलिं या उपलब्धि राज्यम नवीकरणीय ऊर्जा का विस्तार का वास्ता जो काम करे गैन वूंतैं राष्ट्रीय स्तर पर मिलिं पछांण छ।
