उत्तराखण्ड मा सख्त भू कानून कैबिनेट मा मंजूर

उत्तराखंड विधानसभा बजट सत्रा बीच आयोजित कैबिनेट बैठक मा राज्य मा सख्त भू कानून तैं मंजूरि मिलिगे।विधानसभा बजट सत्रा दूसरा दिन सदनै कार्यवाही से पैलि मुख्यमंत्री पुष्कर सिंह धामी कि अध्यक्षता मा आयोजित कैबिनेट बैठक मा मंत्रिमंडलन उत्तराखंड भू कानून (Uttarakhand Land Law)तैं मंजूरि देयलि।

भू कानून तैं मंजूरि मिलणा बाद मुख्यमंत्री पुष्कर सिंह धामीन अपणि पोस्ट मा लिखि- “राज्य, संस्कृति अर मूल स्वरूपै रक्षक हमारी सरकार !” हमारी सरकार जनताऽ हितों खुणि पूरी तरौं से प्रतिबद्ध छ। हम कभि भि जनता विश्वास तैं टूटण नि द्यूंला। हम अपणा राज्य अर संस्कृति कि रक्षा खुणि सदान कोशिश करणा रौंला। ये कानून से प्रदेशो मूल स्वरूप बणैकि रखण मा भौत मदद मिललि।
क्या छ नयो भू कानून?
उत्तराखंड कैबिनेटै मंजूरी मिल्यां ये भू कानून मा अब भैरा लोगु खुणि जमीन खरीदणा नियम सख्त बणाया छन। हिमाचलै तर्ज पर उत्तराखंड मा भि कुछ प्रतिबंध लागू होला।यांसे स्थानीय लोगु का हक हकूक कि रक्षा ह्वे सकलि।
उत्तराखंड विधानसभा मा पेश होलु भू कानून
भू कानूना ये प्रस्ताव तैं बजट सत्र मा उत्तराखंड विधानसभा मा पेश करे जालु।प्रस्ताव पारित होंदै राज्य मा भूमि खरीदणा नया नियम लागू ह्वे जाला।