उत्तरकाशी। उत्तरकाशी, प्रधानमंत्री नरेन्द्र मोदी जीन गंगोत्री का शीतकालीन प्रवास मुखवा अर हर्षिल ऐकि उत्तराखंड विंटर टूरिज्म की ब्रांडिंग घाम तापो पर्यटन का रूप मा करि। य बात सच छ कि ठण्ड्यूं मा जब तखुंद धुंध लगीं रौंद लोग जडन थुथराणा रौंदन तौं दिनु डांडा कांठौं मा चटकताल़ को घाम लग्यूं रौंद। वीं ठंड का कु निरभगि नि तपण चालो घाम? प्रधानमंत्री वूंई दिनु उत्तराखण्ड ऐकि घाम तापणै बात करणा छन। लोग घाम तापणों उत्तराखण्ड औंण लगि जाला त ह्वेतगे बारामासी पर्यटन।
प्रधानमंत्रीन बोलि कि उत्तराखंड ठंड्यूं मा बि पर्यटना वास्ता खास छ।कॉरपोरेट जगत, फिल्म इंडस्ट्री, योग साधक ज्वान नवान इख विंटर टूरिज्म को अनुभव ल्हे सकदन।
प्रधानमंत्रि मोदिन बोलि कि उत्तराखंडै यह भूमि, आध्यात्मिक ऊर्जा से औत प्रोत छ। वूंन बोलि कि यीं भुमि से मेरु आत्मीय लगाव छ जीवनदायनी मां गंगा शीतकालीन गद़्दी स्थल मा ऐकि मि अपणा परिवारा लोगु बीच पौंछी अफुतैं धन्य समझणू छौं। आज मि इख पौंछी अपणि दीदि भुल्यूं तैं समल़ुणू छौं, मिलणू जुलणू छौं।
सरकार यीं कोशिश मा छ कि उत्तराखंडा बॉर्डरा इलाकों तलक पर्यटक पौंछुन। वूं बोलि सीमांत का जौं गौ तैं पैलि आखरि गौं बोले जांदो छौ सि अब देश का पैला गौं ह्वेगेनि। सीमांता यूं गौं का विकासा वास्ता
वाइब्रेंट विलेज योजना शुरू करीं छ। यीं योजना का अन्तर्गत नेलांग और जादुंग गांव फिर से बसाएणा छन। प्रधानमंत्रीन बोलि कि उत्तराखंड का टिम्मबरसैंण, महादेवसैंण, माणा अर जादुंग गौं मा पर्यटकों खुणि आधारभूत सुविधाएं जोड़ेणी छन। जादुंग गौं 1962 मा चीन युद्ध का टैम पर खाली करायेगे छौ अब 70 साल बाद सरकार ये गौं फिरसे बसाणी छ। प्रधानमंत्रीन बोलि कि हमारा इख उत्तराखण्ड मा हजारों करोड़ रुप्ये वैडिंग इकॉनामी छ।वूंल देशवासियों से वेड इन इंडिया के तहत अपणै देशमा ब्यो करणै अपील करि। प्रधानमंत्रीन बोलि कि भारतै फिल्म इंडस्ट्री बि उत्तराखंड जनै फरक सकद। उत्तराखंड तैं मोस्ट फिल्म फ्रैंडली स्टेट को पुरस्कार बि मिल्यूं छ।इख फिल्म शूटिंग खुणै शानदार सुविधा विकसित करेणी छन। प्रधानमंत्रीन बोलि दुनिया कति देश विंटर टूरिज्म खुणि जाणे जांदन उत्तराखंड इना देशु से भौत कुछ सीख सकद। यांका वास्ता उत्तराखंड मा पर्यटन क्षेत्र मा काम करण वाल़ा लोगु तैं अध्ययन कर्यूं चैणू। उत्तराखंड मा भौत जगा गरम पाणि का धारा छन इनि जगा वेलनेस स्पा का रूप मा विकसित करे सकेंदन। इख धार्मिक आध्यात्मिक और योग जगत के दिग्गज सर्दियों मा अपणा विशेष योगा कैम्प लगै सकदन।
