चारधाम यात्रा 2025 : पवित्र गंगोत्री-यमनोत्री धाम का कपाट खुलण का दगड़ा हि चारधाम यात्रा ह्वेगे शुरु

अक्षया तृतीया का पावन पर्व पर बुधवार सुबेर 10 बजी 30 मिनट पर विधि विधान से वैदिक मंत्रोच्चारण अर पूजापाठ का बाद प्रसिद्ध गंगोत्री धाम का कपाट  श्रद्धालुओं का वास्ता खुल गैनी। वखि यमनोत्री धाम का कपाट सुबेर 11 बजी 55 मिनट पर खुलीन्। कपाट खुलणा बगत पर हेलिकॉप्टर से पुष्प वर्षा करेगे। अब अगला 6 मैना तक श्रद्धालु गंगोत्री-यमनोत्री धाम मा मॉं गंगा  अर मॉं यमुना का दर्शन करि सकदन। गंगोत्री धाम मा प्रधानमंत्री नरेंद्र मोदी का नाम से पैलि पूजा करेगे। ये मौका पर गंगोत्री मंदिर परिसर तैं करीब 15 कुंटल फूलों से सजयेगे छयो।

कपाट खुलण का शुभ अवसर पर मुख्यमंत्री पुष्कर सिंह धामी न् गंगोत्री धाम पौंछिकै मॉं गंगा का दर्शन करीन्। ये दौरान पूरा गंगोत्री धाम मॉं गंगा का जैकारा सुणेणा रैनि। देश का अलग-अलग प्रांतों बटि अयां हज़ारों श्रद्धालुओं न् मॉं गंगै विग्रह मूर्ति का दर्शन करीन् । यमुनोत्री अर गंगोत्री धाम की कपाट खुलण का दगड़ हि उत्तराखंड मा चार धाम यात्रा की शुरुआत ह्वेगे।

ये ही क्रम मा श्री केदारनाथ का कपाट 2 मई 2025 कू सुबेर 7 बजी, जबकि श्री बद्रीनाथ धाम का कपाट 4 मई 2025 कु सुबेर 6 बजि खुलिणीन्। ये का बाद यात्रा अपणी चरम पर होलि। अब तक दस लाख से ज्यादा श्रद्धालु न् पैल्यी ऑनलाइन रजिस्ट्रशन करैयाले । यीं बार चार धाम दर्शनों का वास्ता रिकॉर्ड श्रद्धालुओं का आणै उम्मीद छ।

चारधाम यात्रा खुणि आण वल़ा तीर्थयात्रियों कि सुरक्षा का वास्ता प्रशासन का व्यापक इंतजाम कर्यां छन। चप्पा-चप्पा पर सुरक्षाबलों की तैनात होला, दगड़ मा पूरा यात्रा रूट तैं ड्रोन से कवर करे जालो। 2000 का करीब सीसीटीवी कैमरे का माध्यम से यात्रा रूट पर सुरक्षा अर यातायात की निगरानी करे जाली।