“गैरसैण किताब कौथिग” की शानदार शुरुआत

उत्तराखंड की ग्रीष्मकालीन राजधानी गैरसैण मा द्वि दिनौ किताब कौथिग शुरु ह्वेगे।  5 अर 6 अप्रैल 2025 खुणि गैरसैण मुख्य मैदान मा आयोजित “गैरसैण किताब कौथिग” को उद्घाटन गैरसैंण नगर पंचायत का नवनिर्वाचित अध्यक्ष मोहन भंडारी,  पद्मश्री माधुरी बड़थ्वाल का करकमलों से प्रसिद्ध कवि – रंगकर्मी मदन डुकलान, साहित्यकार बीना बेंजवाल, शांति प्रसाद “जिज्ञासु”, उप्रेती दीवान कनवाल, डॉ अजय ढोंडियाल, पूर्व स्वास्थ्य निदेशक ललित उप्रेती आदि क्षेत्र का गणमान्य लोगों का उपस्थिति मा दीप प्रज्वलन का दगड़ ह्वे।कार्यक्रम का पौंछ्यां मैमानों को स्वागत कर्दा नगर अध्यक्ष मोहन भंडारी न् बोले कि क्षेत्र का वास्ता यो आयोजन भौत खास छ अर अगनै बि वो इना आयोजन गैरसैण मा कर्ना राला।

मुख्य अतिथि पद्मश्री माधुरी बड़थ्वाल जीन् बि प्रदेश की ग्रीष्मकालीन राजधानी मा आयोजित ये कार्यक्रम तैं खास बतै। वूंन बोले कि इना कार्यक्रमों से आपस मा संवाद को मौका मिलद।

5 – 6 अप्रैल मा हूण वल़ा ये द्वि दिना कार्यक्रम मा 50 प्रकाशकों की लगभग 40,000 पुस्तक प्रदर्शन व बिक्री का वास्ता उपलब्ध राली। कार्यक्रम का दौरान पर्यावरण, स्वास्थ्य, लोकसंगीत का समसामयिक मुद्दों पर परिचर्चा, आधुनिक तकनीक की जानकारी, विज्ञान का खेल, दूरबीनों से तारा अवलोकन, कवि सम्मेलन, नेचर वॉक, स्वयं सहायता समूहों का स्टॉल व प्रसिद्ध लेखकों से बातचीत आदि गतिविधि होली। कार्यक्रम 5 अर 6 अप्रैल मा द्विया दिन सुबेर 10 बजे से शाम 7 बजे तक होण अर सब्यूं खुणि प्रवेश निशुल्क छ।आयोजन स्थल का पास प्रसिद्ध कलाकार मुकुल बडोनी द्वारा स्कूली बच्चों दगड़ वॉल पेंटिंग कार्यशाला बि करेगे।