मुख्यमंत्री न् करे आइकॉनिक सिटी ऋषिकेश राफ्टिंग बेस स्टेशन, बहुमंजिला कार पार्किंग अर कार्यालय भवन निर्माण को शिलान्यास

मुख्यमंत्री श्री पुष्कर सिंह धामी न् शुक्रवार खुणि ऋषिकेश गंगा कोरिडोर परियोजना का प्रथम चरण मा आइकॉनिक सिटी ऋषिकेश राफ्टिंग बेस स्टेशन को शिलान्यास करे। परियोजना का पैला चरण मा येको निर्माण शिवपुरी से मुनी की रेती तक करे जालो। भारत सरकार द्वारा येका वास्ता 100 करोड़ रुपये वित्तीय सहायता स्वीकृत कर्यीं छ, परियोजना तैं 2 साल मा पूरो कर्नो लक्ष्य छ।

मुख्यमंत्री न् ऋषिकेश मा बहुमंजिला कार पार्किंग अर कार्यालय भवन निर्माण को बि शिलान्यास करेगे। नगर निगम ऋषिकेश की भूमि पर बहुमंजिला कार पार्किंग अर कार्यालय निर्माण को काम लगभग 136 करोड़ रूपये लागत से एमडीडीए द्वारा करे जालो। लगभग 10 हजार 441 वर्ग मी. भूमि पर 1038 वाहनों का वास्ता बहुमंजिला पार्किंग अर नगर निगम ऋषिकेश, जल संस्थान ऋषिकेश अर यूपीसीएल का कार्यालयों का। वास्ता भवन निर्माण करे जालो। पार्किंग अर कार्यालय निर्माण मा अग्निशमन सुरक्षा, आधुनिक सीसीटीवी, एक्सैस कंट्रोल सिस्टम का दगड़ वर्षा जल संचय, सोलर लाईट, लिफ्ट, हरित क्षेत्र अर हौरि काम करे जालो।

नगर निगम ऋषिकेश मा लगभग 1 करोड़ 51 लाख का बनि-बनि का कामों को बि मुख्यमंत्री न् लोकार्पण करे। कार्यक्रम का दौरान मुख्यमंत्री न् पर्यावरण मित्रों तैं मेडिकल किट अर यात्री मित्र किट बि दे। ये मौका पर मुख्यमंत्री न् हाइड्रोजेल वाटरलेस टॉयलेट को उद्घाटन बि करे।

मुख्यमंत्री न् बोले कि ऋषिकेश मा राफ्टिंग बेस स्टेशन बणण से राफ्टिंग क्षेत्र से जुड़्यां स्थानीय लोगों तैं रोजगार बढ़लो। ऋषिकेश तैं रिवर राफ्टिंग का वैश्विक हब का रूप मा स्थापित कर्नै दिशा मा हम एक कदम हौरि अगनै बढ़्यां। राफ्टिंग बेस स्टेशन का दगड़ै-दगड़ पर्यटकों का वास्ता आरामदायक स्टेशन अर नदी किनरा बोर्डवॉक को बि निर्माण करे जालो।

मुख्यमंत्री न् बोले कि ऋषिकेश मा एक हजार से जादा गाड्यूं वल़ि बहुमंजिला पार्किंग का बणणा बाद ट्रैफिक अर पार्किंग की समस्या से काफी राहत मिललि। चारधाम यात्रा का समय ऋषिकेश मा होण वल़ि ट्रैफिक जाम की स्थिति तै काफी हद तक संभल़े सकेंद। अलग-अलग विभागों का कार्यालय एक दगड़ एक समणि बणण से आम लोगों तैं काफी सुविधा होलि।

मुख्यमंत्री न् बोले कि प्रधानमंत्री श्री नरेन्द्र मोदी का मार्गदर्शन मा राज्य हर क्षेत्र मा तेजी से अगाड़ि बढ़णू छ। सड़क, रेल अर हवाई कनेक्टिविटी का विस्तार का साथ इंफ्रास्ट्रक्चर तैं मजबूत बणाणा वास्ता बि कतना काम हुयां। चारधाम सड़क परियोजना अर ऋषिकेश – कर्णप्रयाग रेल लाइन परियोजना राज्य का विकास मा मील को पत्थर साबित होलि। वूंन बोले कि ऋषिकेश मा सोलह सौ करोड़ रुपए से बिंडि की लागत से क्षेत्र का बुनियादी ढांचे तैं सशक्त बणाणा कोशिश करेगे। अमृत भारत स्टेशन योजना का तहत योगनगरी ऋषिकेश रेलवे स्टेशन तैं विश्वस्तरीय सुविधाओं से युक्त बणये जाणू छ। ऋषिकेश से नीलकंठ महादेव मंदिर तक रोपवे निर्माण की दिशा मा बि प्रगति होणी छ। क्षेत्र मा सुगम जल आपूर्ति का वास्ता 557 करोड़ रुपए की विकास परियोजनाओं दगड़ हि 183 करोड़ रुपए की लागत से सीवर लाइन का निर्माण पर बि काम होणू छ।

मुख्यमंत्री न् बोले कि ऋषिकेश मा राफ्टिंग खुणि वैश्विक स्तर की सुविधा, रोपवे की बेहतर सुविधा अर शटल सेवाएं होली त आण वल़ा समय मा ऋषिकेश पर्यटकों तैं हौरि जादा आकर्षित कारलो, जैमा व्यवसाय अर रोजगार बढ़लो। वूंन लोगों से आह्वान करे कि साल मा एक दिन मिलिकै तिरंगे का दगड़ गंगा नदी मा राफ्टिंग करा, यांसे देश भक्ति को एक अद्भुत नजारा देखणौ तैं मिललो।

ये मौका पर कैनिबेट मंत्री श्री सुबोध उनियाल, विधायक श्री प्रेमचंद्र अग्रवाल, श्रीमती रेणु बिष्ट, मेयर ऋषिकेश श्री शंभु पासवान, प्रमुख सचिव श्री मीनाक्षी सुंदरम, कमिश्नर गढ़वाल श्री विनय शंकर पांडेय, आईजी गढ़वाल श्री राजीव स्वरूप, जिलाधिकारी देहरादून श्री सविन बंसल, उपाध्यक्ष एमडीडीए श्री बंशीधर तिवारी अर संबंधित अधिकारी उपस्थित छया।