12 जनवरी 2025 मा पूर्व सैनिक अर गढ़वाली रचनाकार बलबीर सिंह राणा ‘अडिग’ को गढ़वाली कहानि संग्रह ‘बिदै अर हौरि कहानि’ को विमोचन गढरत्न नरेंद्र सिंह नेगी का करकमलों से ह्वे। ग्राम सोड़ा सरोली, रायपुर देहरादून मा आयोजित ये कार्यक्रम मा मुख्य अतिथि नरेंद्र सिंह नेगी जीन् बोले कि य गढ़वाली भाषा का वास्ता भौत भल्ली बात छ कि हाथ मा बंदूक ल्हेकि देश की रक्षा कर्न वळा बलबीर राणा ‘अडिग’ अब कलम उठैकि अपणि मातृभाषा की सेवा मा जुड़गिन। यीं पोथि पर अपणी विचार रखदि वरिष्ठ गढ़वाली कवियत्री बीना बेंजवालन् बोलि कि सैन्य पृष्ठभूमि कि छाप बलबीर राणा ‘अडिग’ की कहानियों मा साफ दिखेंद।
पोथि विमोचन का ये कार्यक्रम का बाद एक गढ़वाली कवि सम्मेलन बि ह्वे। जैमा गढरत्न नरेंद्र सिंह नेगी, मदन मोहन डुकलाण, गिरीश सुंदरियाल, ओमप्रकाश सेमवाल, ओम बधाणी, बलबीर राणा अडिग, बीना बेंजवाल, प्रेमलता सजवाण, धर्मेंद्र नेगी, हरीश जुयाल ‘कुटज’ जना गढ़वाली का जण्या-मण्या कवियों न् अपणि कवितौं को पाठ करे। कवि सम्मेलन को संचालन गणेश खुगशाल गणी द्वारा करेगे।
