बीरबाला तीलू रौतेली की 365वीं जयंती पर डाक टिकट विमोचन

बीरबाला तीलू रौतेली की 365वीं जयंती का मौका पर डाक विभाग द्वारा वींका सम्मान मा एक डाक टिकट अर खास लिफाफा को विमोचन करेगे। गढ़वाल को द्वार बोले जाण वळा कोटद्वार मा आयोजित ये कार्यक्रम मा  कोटद्वार का मेयर शैलेन्द्र सिंह रावतन बोलि कि भारत सरकारै तरफां बिटिन वीरबाला तीलू रौतेल्या नौं परैं डाक टिकट जारी होणो उत्तराखंडै वीरांगना का सम्मान की दिशा मा सुन्दर अर जरुरी कदम छ। वूंन बोली कि तीलू रौतेली को साँसो अर वीरता औंण वळि पीढ़ि का वास्ता प्रेरणास्रोत छ। डाक टिकट का माध्यम से देशभर मा वूंकी बीरगाथा अर योगदान तैं पहचान मिलली। यांकै दगड़, ज्वान(युवा) पीढ़ि तैं तीलू रौतेली का जीवन अर वूंकी व साहस से प्रेरणा ल्हेण को मौका  मिललो।

   बीरबाला तीलू रौतली गढ़वाल की यनि वीरांगना छई जैन मात्र 15 साल की उमर मा दुश्मन सेना का छक्का छुड़े देनी। वींकी वीरता की कहानी गढ़वाल मा लोकगाथा अर लोकगीतों का रूप मा वर्षूं बिटि गयेणी छन। वीं को साहस अर संघर्ष आजै पीढ़ी वास्ता भौत प्रेरणादायक छ।  इलै राज्य स्तर पर भी सरकार राज्य मा महिला सशक्तिकरण की दिशा मा काम कर्न वळि महिलाओं तैं वींकी जयंती 8 अगस्त खुणि पुरस्कृत करदि।

तीलू रौतेली की जयंती 8 अगस्त खुणि प्रदेश मा समाज द्वारा अलग-अलग कार्यक्रम करे जांदन। कोटद्वार मा आयोजित ये कार्यक्रम मा कोटद्वार का कई जण्यामण्या लोग, जन प्रतिनिधि अर डाक विभाग का अधिकारी व कर्मचारी उपस्थित छया।