अरुणाचल का रंगकर्मी, साहित्यकार ताई तुगुंग तैं मिले तिसरो नरेन्द्र सिंह नेगी संस्कृति सम्मान
12 अगस्त खुणि मनयेगे गढगौरव नरेंद्र सिंह जी को जन्मदिन, मुख्यमंत्री धामी छया मुख्य अतिथि
रिपोर्ट-आशीष सुंदरियाल
हिमालयी राज्यों मा सामाजिक, साहित्यिक, सांस्कृतिक इर लोक कला का क्षेत्र मा खास योगदान दैण का खातिर स्थापित ‘नरेन्द्र सिंह नेगी संस्कृति सम्मान’ ये साल अरुणाचल प्रदेश का जण्या-मण्या रंगकर्मी, फिल्म अभिनेता अर साहित्यकार श्री ताई तुगुंग तैं दियेगे।
सोशल बलूनी पब्लिक स्कूल, देहरादून मा आयोजित एक भव्य कार्यक्रम मा उत्तराखंड का मुख्यमंत्री पुष्कर सिंह धामी न् यो पुरस्कार श्री ताई तुगुंग तैं दे। ये मौका पर मुख्यमंत्री पुष्कर सिंह धामी न् बोले कि
दिल्ली स्थित सेवा भारती सेवाधाम विद्या मंदिर आवासीय विद्यालय मा कक्षा 6 से 12 तकै पढ़ै कर्न वळा ताई तुगुंग आज अरूणाचल प्रदेश का सुपर स्टार छन। वूंतै नरेंद्र सिंह नेगी जी का नौ को पुरस्कार मिलणो अपणा आप खास छ किलैकि नरेंद्र सिंह नेगी जी को स्वयं को व्यक्तित्व भी हिमालय जनो विराट छ।
सम्मान पौण वळि शख्सियत ताई तुगुंग न् अपणा संबोधन मा बोले कि वेन कबि सुपन्या मा बि नि सोचि छौ कि अरूणाचल का एक आदिवासी मनखि तैं इतना दूर उत्तराखंड क्वी सम्मान मिललो। घड़ेक वो यीं बात सोचिक भावुक ह्वेगेन।
उत्तराखण्ड लोक समाज द्वारा दिये जाण वळो यो सम्मान हिमालयी राज्यों मा उत्कृष्ट योगदान का वास्त दिये जांद।ये साल ये सम्मान को यो तिसरो सोपान छयो। पैलि साल यो सम्मान गढ़गौरव नरेन्द्र सिंह नेगी तैं, दुसरा साल हिमाचल प्रदेश का वरिष्ठ साहित्यकार संतराम हरनोट तैं अर ये साल यो सम्मान अरुणाचल प्रदेश का प्रसिद्ध रंगकर्मी अर अरुणाचल प्रदेश की पैला सुपरस्टार ताई तुगुंग तैं दियेगे। ये मौका पर नरेंद्र सिंह नेगी जी का गीतों को अंग्रेजी अनुवाद ‘ माउंटेन मेलोडीज़ ऑफ नरेंद्र सिंह नेगी’ को बि लोकार्पण ह्वे। यो अनुवाद उत्कृष भट्ट न् करे।
नरेंद्र सिंह नेगी जी का जन्मदिन 12 अगस्त खुणि आयोजित ये कार्यक्रम मा डॉ नवीन बलूनी, इन्द्रजीत सिंह नेगी, नितीश बलूनी, शिक्षाविद शिव प्रसाद सेमवाल, सामाजिक कार्यकर्ता दिगमोहन सिंह नेगी, विपिन बलूनी, साहित्यकार बीना बेंजवाल, रमाकांत बेंजवाल, डॉ नन्द किशोर हटवाल, अनिल नेगी, डॉ सत्यानंद बडोनी, पत्रकार दिनेश शास्त्री सेमवाल, मनोज इष्टवाल, लोककलाकार गिरीश सनवाल, दीपक रावत, विवेक नौटियाल, कविलास नेगी, सोहन चौहान दगड़ हौरि कतनै कलाकार, साहित्यकार अर अलग-अलग क्षेत्रों से जुड़्या लोग मौजूद छया। कार्यक्रम को संचालन गणेश खुगशाल गणी न् करे।
